बाल विद्यामंदिर शिक्षण संस्था ही कै. म. शं. शिवणकर गुरुजी यांच्या शिकवणी वर्गातून उदयास आली. शारीरिक व्यंगत्व बाजूला ठेवून विद्यार्थ्यांच्या उन्नतीसाठी शिवणकर गुरुजी यांनी परभणी शहरातील प्रतिष्ठित व शिक्षणाविषयी आवड असणाऱ्या मान्यवरांना सोबत घेऊन सन 1967 मध्ये बाल विद्यामंदिर शिक्षण संस्थेची स्थापन केली.

संस्थेचे पहिले अध्यक्ष म्हणून कै. फिरोजशा पारख यांनी मोठे योगदान दिले. परभणी शहराचा शैक्षणिक अनुशेष भरून निघावा यासाठी संस्थेची यशस्वी वाटचाल सुरू केली. यामध्ये त्यांना रघुभाई पटेल, प्रेमजी कजेरिया यांच्यासह संचालक मंडळाची साथ लाभली. पुढे परभणी शहरातील वैद्यकीय क्षेत्रात आपल्या कार्याचा ठसा उमटवलेले स्व. डॉ. पांडुरंग नावंदर यांची मोलाची साथ त्यांना लाभली.

स्व. डॉ. पांडुरंग नावंदर यांनी संस्थेचे संचालक, उपाध्यक्ष व चिटणीस म्हणून जबाबदारी यशस्वीपणे पार पाडली. संचालकांचा विश्वास सार्थ केला. त्यांचा शिक्षणाकडे पाहण्याचा दृष्टिकोन, दूरदृष्टी व संस्थेविषयी असणारी प्रचंड तळमळ यामुळे संस्थाध्यक्षांची जबाबदारी त्यांच्याकडू आली.

स्व. डॉ. पांडुरंग नावंदर हे संस्थेचे अध्यक्ष झाल्यानंतर त्यांनी संस्थेसाठी स्वत:ला पूर्णपणे वाहून घेतले. वैद्यकीय क्षेत्रातील सेवा करीत असताना,  बाल विद्यामंदिर शिक्षण संस्थेच्या उन्नतीचा व विद्यार्थ्यांच्या प्रगतीचा अविरत ध्यास घेतला. आणि तो समर्थपणे सांभाळला. अल्पावधीतच त्यांनी संस्थेच्या या रोपट्याचे वटवृक्षात रूपांतर केले. परभणी शहरातील सर्वदुर परिसरातील विद्यार्थ्यांना बाल विद्यामंदिर शिक्षण संस्थेचा लाभ घेता यावा म्हणून वैभवनगर येथे हायस्कूल विभाग सुरू केला.

सन 2004-05 मध्ये इंग्रजी माध्यमाच्या धर्तीवर अंबिका नगर येथे बाल विद्याविहार या सेमी इंग्रजी माध्यमाच्या प्रशालेची उभारणी केली. परभणी शहरात सर्वप्रथम सी. ई. टी. सेल सुरू करण्याचा प्रयोग त्यांनीच केला.

संस्थेच्या भौतिक विकास करण्यावर त्यांचा कटाक्ष होता. त्यांनी संस्थेच्या प्रत्येक शाखेच्या स्वतंत्र इमारती उभारल्या. फर्निचर सुविधा, संगणक लॅब, विज्ञान प्रयोगशाळा, संगीत कला दालन, सुसज्ज ग्रंथालय अशा वेगवेगळ्या विभागांची उभारणी केली.

विद्यार्थ्यांना केंद्रबिंदू मानून त्यांच्या सर्वांगीण विकासासाठी संस्थेच्या माध्यमातून जे जे काही देता येईल ते ते सर्व विद्यार्थ्यांना पुरवण्याचे काम त्यांनी केले. विद्यार्थ्यांच्या गुणवत्तेला विकसित करण्याच्या दृष्टिकोनातून उपक्रमशील शिक्षकांना प्रोत्साहन दिले. त्यामुळे त्याचा परिणाम विद्यार्थ्यांच्या गुणवत्तेत झाला.

स्व. डॉ. पांडुरंग नावंदर यांना मोलाची साथ लाभली ते त्यांच्या अर्धांगिनी तथा संस्थेच्या उपाध्यक्षा प्राध्यापक वासंतीताई नावंदर यांची संस्थेचा पदभार स्वीकारुन त्‍यांनी संस्थेतील शिक्षकांना एक नवीन दिशा निर्माण करून दिली. स्वतः वरिष्ठ महाविद्यालयात प्राध्यापिका राहिलेल्या या विदुषींना, शिक्षण, वाचन व लेखनाची आवड होती. त्यामुळे त्यांनी हे संस्कार शिक्षकांच्या माध्यमातून रुजवण्याचा प्रयत्न केला. शिक्षणाबरोबर विद्यार्थ्यांना संस्काराचे धडे दिले. किशोरवयीन मुलींना योग्य मार्गदर्शन करुन त्यांच्यात आत्मविश्वास व जागृती निर्माण केली.

स्व. डॉ. पांडुरंग नावंदर यांना त्यांच्या सर्व सहकाऱ्यांची खंबीर साथ लाभली. त्यांच्या प्रत्येक निर्णयात सहकाऱ्यांनी मोलाचे योगदान दिले.

आज अध्यक्ष म्हणून माझ्यावर जबाबदारी असताना, मी स्व. डॉ. पांडुरंग नावंदर यांच्या मार्गदर्शनाखाली संस्थेत अनेक वर्ष काम केल्यामुळे, संस्थेचा वैभवशाली वारसा पुढे नेताना मला मनस्वी आनंद होत आहे. संस्थेचे सचिव डॉक्टर विवेक नावंदर यांच्या कार्यशैलीमुळे आजमितीस संस्थेची बाल विद्यावर्धिनी सी. बी. एस. ई. इंग्लीश स्कूल  नावारूपास आली आहे. तसेच विद्यार्थ्यांची शैक्षणिक ओढ पाहून बाल विद्या फाउंडेशनची उभारणी केली आहे. आज संस्थेमध्ये 6000 पेक्षा अधिक विद्यार्थी शिक्षण घेत आहेत याचा आम्हाला सार्थ अभिमान आहे.

सध्या या संस्थेच्या वाटचालीत संस्थेचे सचिव डॉ. विवेक नावंदर, उपाध्यक्ष ॲड. विलास पोहंडूळकर, सहसचिव ॲड. मा. संजय देशपांडे, कोषाध्यक्ष विनय नावंदर, ज्येष्ठ संचालक ॲड. अशोक सोनी, संचालक मा. पवनकुमार झांजरी (जैन), मा. एम. जी. विहीटकर व डॉ. सौ. अनिता विवेक नावंदर यांची साथ खंबीरपणे पाठीशी आहे.